ភ្នំពេញ៖ ទោះបីជាកន្លងមក លោក ផែង វណ្ណៈ តែងតែរងនូវការរិះគន់លើការប្រើប្រាស់ពាក្យសម្តីខ្លាំងៗ ឬមានចរិតលក្ខណៈ «មាត់អាក្រក់» ក៏ពិតមែន ប៉ុន្តែសកម្មភាពមនុស្សធម៌របស់លោកបានបង្ហាញឱ្យឃើញថា លោកជាអ្នកដែលមានចិត្តសប្បុរសដូចទេវតា តាមរយៈការជួយជ្រោមជ្រែងដល់ជនបរទេសដែលកំពុងជួបការលំបាកក្នុងប្រទេសកម្ពុជា។
ជាក់ស្តែង នៅព្រឹកថ្ងៃទី១៧ ខែកក្កដា ឆ្នាំ២០២៦ លោក ផែង វណ្ណៈ បានចុះទៅជួបដោយផ្ទាល់ និងនាំយកថវិកាចំនួន ៥០០ ដុល្លារ ទៅប្រគល់ជូនស្ត្រីជនជាតិរុស្ស៊ីម្នាក់ ដែលកំពុងជួបបញ្ហាជីវិត និងមានកូនតូចៗចំនួន ២ នាក់ ក្នុងបន្ទុក ខណៈពួកគេកំពុងស្នាក់នៅម្ដុំខណ្ឌសែនសុខ រាជធានីភ្នំពេញ។
មិនត្រឹមតែជួយឧបត្ថម្ភថវិកាបណ្ដោះអាសន្នប៉ុណ្ណោះទេ លោក ផែង វណ្ណៈ ក៏បានបង្ហាញពីឆន្ទៈដ៏មុតមាំក្នុងការជួយសម្រួលឱ្យស្ត្រីរូបនេះបានត្រឡប់ទៅប្រទេសកំណើតវិញ ប្រសិនបើគាត់មានបំណងចង់ទៅ។ លោកបានបញ្ជាក់យ៉ាងច្បាស់ថា លោកនឹងជួយរៀបចំជូនគាត់ទៅកាន់ស្ថានទូត ដើម្បីបំពេញបែបបទធ្វើលិខិតធ្វើដំណើរ។
ទន្ទឹមនឹងនេះ លោក ផែង វណ្ណៈ ក៏បានសន្យាប្រកាសជួយចេញថ្លៃសំបុត្រយន្តហោះ រួមទាំងរាល់ការចំណាយផ្សេងៗដែលចាំបាច់ទាំងអស់ ដើម្បីធានាឱ្យស្ត្រីជនជាតិរុស្ស៊ីរូបនេះ និងកូនៗអាចវិលត្រឡប់ទៅស្រុកកំណើតវិញបានដោយសុវត្ថិភាព។
សកម្មភាពមនុស្សធម៌របស់លោក ផែង វណ្ណៈ នាពេលនេះ បានទទួលការកោតសរសើរពីសំណាក់មហាជន ដោយមើលឃើញថា បើទោះបីជាលោកមានភាពចម្រូងចម្រាសលើរឿងពាក្យសម្តីខ្លះៗក្តី ប៉ុន្តែនៅពេលដែលឃើញអ្នកដទៃជួបការលំបាក លោកមិនដែលព្រងើយកន្តើយឡើយ៕
សូមទស្សនាវីដេអូខាងក្រោមនេះ
