ភ្នំពេញ៖ លោកបណ្ឌិត ពេជ្រ ស្រស់ បានចេញមុខបញ្ចេញទស្សនៈផ្ទាល់ខ្លួន និងបានស្នើសុំដល់អាជ្ញាធរមានសមត្ថកិច្ច ឱ្យធ្វើការពិចារណាដោះលែងបុគ្គលម្នាក់ដែលកំពុងត្រូវបានឃាត់ខ្លួន ដោយលោកយល់ឃើញថា ការឃាត់ខ្លួនកន្លងមកអាចទុកជាការព្រមានគ្រប់គ្រាន់ ប្រសិនបើកំហុសនោះមិនធ្ងន់ធ្ងរ។
យោងតាមសំណេរដែលបានចុះផ្សាយលើបណ្តាញសង្គមរបស់លោកបណ្ឌិត ពេជ្រ ស្រស់ បានគូសបញ្ជាក់ថា ប្រសិនបើកំហុសឆ្គងរបស់បុគ្គលខាងលើមិនមានលក្ខណៈធ្ងន់ធ្ងរនោះទេ លោកសុំឱ្យអាជ្ញាធរចាត់ទុកការឃាត់ខ្លួនរយៈពេល ៤៨ម៉ោងកន្លងមកនេះ ជាការព្រមានចុងក្រោយ ហើយមិនគួរមានការបន្តពន្យារពេលរក្សាខ្លួនរហូតដល់ ៧២ម៉ោងបន្ថែមទៀតនោះឡើយ។
ការលើកឡើងរបស់លោកបណ្ឌិត ពេជ្រ ស្រស់ នាពេលនេះ កំពុងតែទទួលបានការចាប់អារម្មណ៍ និងការជែកវែកញែកយ៉ាងច្រើនពីសំណាក់មហាជន។ ទោះជាយ៉ាងណាក៏ដោយ គិតមកទល់ពេលនេះ នីតិវិធីនៃការចោទប្រកាន់ជាផ្លូវការលើបុគ្គលរូបនោះ ត្រូវបានស្ថាប័នយុត្តិធម៌ប្រកាសជាសាធារណៈរួចរាល់ហើយ ខណៈដែលមហាជនកំពុងបន្តតាមដានចំណាត់ការបន្តរបស់អាជ្ញាធរមានសមត្ថកិច្ចលើករណីនេះ៕
