ភ្នំពេញ៖ លោក ផែង វណ្ណៈ ដែលជាអ្នកលេងបណ្តាញសង្គមដ៏ល្បីឈ្មោះមួយរូប បានចេញមុខបកស្រាយ និងការពារយុវតីម្នាក់ដែលកំពុងរងការរិះគន់នៅលើបណ្តាញសង្គម ពាក់ព័ន្ធនឹងការលើកឡើងពីបញ្ហាប្រាក់ខែទាប និងការសម្រេចចិត្តក្នុងរឿងគូស្រករ។
នៅក្នុងការបង្ហោះសារមួយកាលពីពេលថ្មីៗនេះ លោក ផែង វណ្ណៈ បានបង្ហាញការយល់ស្របទៅនឹងការលើកឡើងរបស់ក្មួយស្រីរូបនោះ ដោយលោកបានគូសបញ្ជាក់ថា អ្វីដែលក្មួយស្រីបាននិយាយនោះគឺ «មិនខុសទេ»។ លោកបានពន្យល់ថា ក្នុងបរិបទសេដ្ឋកិច្ចបច្ចុប្បន្ន ដែលទំនិញ និងការចំណាយលើជីវភាពរស់នៅមានតម្លៃខ្ពស់ ការមានប្រាក់ខែទាបពិតជាបង្កការលំបាកខ្លាំងដល់ការរស់នៅ។
លោក ផែង វណ្ណៈ បានរៀបរាប់ពីបន្ទុកចំណាយជាក់ស្តែងដូចជា៖ ថ្លៃទឹក ថ្លៃភ្លើង ថ្លៃបន្ទប់ជួល ថ្លៃម្ហូបអាហារ ថ្លៃប្រេងម៉ូតូ និងថ្លៃព្យាបាលជំងឺជាដើម។ លោកបានសង្កត់ធ្ងន់ថា៖ «ដូច្នេះបើរកគូស្រករពេលប្រាក់ខែទាប អាចប្រឈមមុខនឹងជីវភាពប្រចាំថ្ងៃ»។ លោកក៏បានប្រៀបធៀបទៅនឹងសម័យមុន ដែលទំនិញមានតម្លៃធូរថ្លៃ និងមានការជួយជ្រោមជ្រែងពីឪពុកម្តាយ ខុសប្លែកពីសម័យបច្ចុប្បន្ន។
ជុំវិញការរិះគន់ និងការជេរប្រមាថពីសំណាក់មតិមួយចំនួនលើបណ្តាញសង្គមចំពោះយុវតីរូបនោះ លោក ផែង វណ្ណៈ បានអំពាវនាវឱ្យមហាជនមានការយោគយល់ និងកុំប្រកាន់ទោសអូសដំណើរ។ លោកបានណែនាំថា ប្រសិនបើមិនពេញចិត្តនឹងការលើកឡើងរបស់ក្មួយស្រីនោះទេ សូមមេត្តាគ្រាន់តែអូសរំលង ឬធ្វើការប្លុក (Block) ចោលទៅ ជាជាងការជេរប្រមាថ។
ជាចុងក្រោយ លោកក៏បានឆ្លៀតរំលឹកដល់ព្រឹត្តិការណ៍ប្រវត្តិសាស្ត្រនៃខួបមួយឆ្នាំ ដែលទាហានសៀមបានលើកទ័ពឈ្លានពានប្រទេសកម្ពុជា ដោយលោកបានអំពាវនាវឱ្យប្រជាពលរដ្ឋខ្មែរគ្រប់រូប បង្វែរការឈ្លោះប្រកែកគ្នា មកជាការរួបរួមសាមគ្គីគ្នាវិញ ដើម្បីសេចក្តីសុខរបស់ជាតិ។
