ខេត្តសៀមរាប៖ មន្ត្រីនគរបាលចរាចរណ៍ផ្លូវគោកម្នាក់ (មានឋានន្តរស័ក្តិ ៤) បានបាត់បង់ជីវិតយ៉ាងអាណោចអាធ័មក្នុងគ្រោះថ្នាក់ចរាចរណ៍មួយ កាលពីវេលាម៉ោង ៩:៤៣នាទីយប់ ថ្ងៃទី១៨ ខែកក្កដា ឆ្នាំ២០២៦ កន្លងទៅនេះ នៅក្បែរស្តុបកោះកេរ្តិ៍ ក្រុងសៀមរាប។
គួររំលឹកថា នៅកន្លែងកើតហេតុភ្លាមៗ បន្ទាប់ពីមានគ្រោះថ្នាក់ ស្ត្រីម្នាក់ដែលជាអ្នករួមដំណើរក្នុងរថយន្តបង្ក បានចេញមុខតវ៉ា និងរារាំងអ្នកសារព័ត៌មានមិនឱ្យថតផ្សព្វផ្សាយ ដោយបានអះអាងទាំងទទឹងទិសថា ម៉ូតូរបស់ជនរងគ្រោះគឺជាអ្នកបើកមកបុកតួរថយន្តរបស់ពួកគេ។
ទោះជាយ៉ាងណាក៏ដោយ ក្រោយពីកិច្ចអន្តរាគមន៍ និងការចុះស្រាវជ្រាវយ៉ាងយកចិត្តទុកដាក់ពីសំណាក់សមត្ថកិច្ចជំនាញ រួមជាមួយការពិនិត្យភស្តុតាងនៅកន្លែងកើតហេតុ បានរកឃើញការពិតថា «រថយន្តបង្កគឺជាអ្នកបើកបរមិនប្រកាន់ស្តាំ ទើបជ្រុលទៅបុកម៉ូតូជនរងគ្រោះ» ដែលបណ្តាលឱ្យមន្ត្រីនគរបាលរូបនោះបាត់បង់ជីវិត។
បច្ចុប្បន្ន សពរបស់មន្ត្រីនគរបាលរងគ្រោះ ត្រូវបានក្រុមគ្រួសារទទួលយកទៅធ្វើបុណ្យតាមប្រពៃណីនៅឯគេហដ្ឋាន។ ដោយឡែក បុរសជាអ្នកបើកបររថយន្តបង្កត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្តសៀមរាប ដើម្បីចាត់ការបន្តតាមនីតិវិធីច្បាប់។
ជុំវិញហេតុការណ៍ដ៏សោកសង្រេងនេះ មហាជនបានសម្តែងការចូលរួមរំលែកទុក្ខយ៉ាងក្រៀមក្រំបំផុតចំពោះក្រុមគ្រួសារនៃសពមន្ត្រីនគរបាល និងកោតសរសើរដល់សមត្ថកិច្ចដែលបានរកយុត្តិធម៌ជូនជនរងគ្រោះ ដោយមិនបណ្តោយឱ្យភាគីបង្កបង្វែរការពិតបានឡើយ៕
