បើរំឭកកាលពីកំឡុងឆ្នាំ ២០០៤ មហាជនអ្នកទស្សនាខ្សែភាពយន្តអប់រំរបស់ស្ថានីយទូរទស្សន៍ប៉ុស្តិ៍លេខ ៥ ប្រាកដជាធ្លាប់បានទស្សនាហើយនូវខ្សែភាពយន្តភាគរឿង រសជាតិជីវិត ដែលមានការសម្តែងដោយអ្នកនាង កែវ ពេជ្រពិសី លោក កែវ ង៉ែត លោក សារ៉ា ចិន្ត្រា និង អ្នកនាង គឹម សុធាថងឌី ជាដើម។
ក្នុងនោះមហាជនអ្នកគាំទ្រច្បាស់ជាចាំមិនភ្លេចនោះទេ នូវតួអង្គរងមួយរូបដែលត្រូវបានមហាជនអ្នកទស្សនាចាប់អារម្មណ៍យ៉ាងខ្លាំង ក៏ព្រោះតែមុខមាត់ពីធម្មជាតិរបស់នាងដែលមានសម្បុរស្រអែម និង សក់រួញៗ គឺតួអង្គឈ្មោះ កញ្ញា ដែលមានការសម្តែងដោយអ្នកនាង គឹម សុធាថងឌី ហៅ Amy។ បច្ចុប្បន្ន អ្នកនាង គឹម សុធាថងឌី ក៏កំពុងតែរស់នៅឯប្រទេសកាណាដា កំពុងសាងជីវិតគ្រួសារយ៉ាងមានសុភមង្គលផងដែរ។
អ្វីដែលកាន់តែធ្វើឱ្យអ្នកគាំទ្រកាន់តែរំភើបនោះ តួអង្គ កញ្ញា ទើបតែទទួលបានសមាជិកថ្មីជាកូនប្រុសគួរឱ្យស្រឡាញ់មួយរូប ដែលអ្នកនាងបានដាក់ឈ្មោះថា «មេឃ»។ ក្នុងនោះ បើគិតមកដល់ថ្ងៃទី ១៩ ខែតុលា ឆ្នាំ ២០២២ នេះ អ្នកនាង គឹម សុធាថងឌី ហៅ Amy សម្រាលកូនប្រុសជាទីស្រឡាញ់បានប្រមាណ ២ សប្តាហ៍ហើយ៕
