ខេត្តកណ្តាល ៖ គ្រាន់តែឃើញរូបភាព និងវីដេអូឃ្លីបមួយចំនួន បង្ហោះក្នុងបណ្តាញសង្គមពិតជាធ្វើឱ្យមហាជនមានការក្តុកក្តួល អួលដើម.កជំនួស បន្ទាប់ពីបានឃើញសិល្បករខ្មែរមួយរូបកំពុងរុំព័ទ្ធទៅដោយជំងឺធ្ងន់ធ្ងរនោះ បានពោលគួរឱ្យអាណិតប្រាប់ទៅភរិយាថា «រូបលោកចង់ស្តាប់ភ្លេងការ ជាលើកចុងក្រោយ» នៃជីវិតរបស់លោក។
វីដេអូ និងរូបភាពដែលបានបង្ហោះក្នុងបណ្តាញសង្គមបានផ្ទុះការចាប់អារម្មណ៍ជាខ្លាំងពីសំណាក់អ្នកប្រើប្រាស់បណ្តាសង្គមហ្វេសប៊ុក និង TikTok ដោយគេបានឃើញបុរសម្នាក់មានរូបរាងកាយស្គមស្គាំង កំពុងដេកស្តាប់ក្រុមសិល្បករច្រៀងចម្រៀងភ្លេងការ សម្រាប់ដង្ហើមចុងក្រោយរបស់លោក ដោយសារតែសិល្បកររូបនេះ កំពុងតែមានជំងឺមហារីក ហើយស្ថិតក្នុងដំណាក់កាលចុងក្រោយ។
បុរសខាងលើនេះ មានឈ្មោះថា រឿង វណ្ណារិទ្ធ ដែលជាសិល្បករល្បីឈ្មោះមួយរូប និងជាអ្នកលេងភ្លេងខ្មែរឲ្យក្រុមលោក យ៉ែម សំអូន។ លោក រឿង វណ្ណារិទ្ធ គឺជាសិល្បករភ្លេងបុរាណ ជំនាញខាងលេងឧបករណ៍ ឃឹម និងរនាថ ទើបតែមានអាយុ៣៥ឆ្នាំប៉ុណ្ណោះ ប៉ុន្តែរូបលោកត្រូវបានញ៉ាំញីដោយជំងឺមហារីក ជីវិតមនុស្សពិតជាមើលមិនឃើញមែន។
អ្នកប្រើប្រាស់បណ្តាញសង្គមបាននាំគ្នាចែករំលែកនូវវីដេអូខាងលើនេះយ៉ាងផុសផុល និងចូលរួមសម្តែងនូវក្តីអាណិតអាសូរ ដោយបានពោលពាក្យលើកទឹកចិត្តឱ្យលោក សុវណ្ណារិទ្ធ ឆាប់ជាពីជំងឺ។
បើតាមអ្នកនាង ទិត្យ សុធារី ដែលជាសមាជិកវង្សភ្លេងជាមួយលោក រឿង វណ្ណារិទ្ធ បានប្រាប់សារព័ត៌មានកោះសន្តិភាពថា លោក រឿង វណ្ណារិទ្ធ មានជំងឺមហារីកពោះវៀនធំនេះយូរមកហើយ ដោយមុនដំបូងលោកគ្រាន់តែមានជំងឺឬសដូងបាត រួចក្រោយមកជំងឺនោះក៏បានក្លាយទៅជាជំងឺមហារីកតែម្តង។
អ្នកនាង សុធារី បានបន្តថា កាលពីដំបូងឡើយ លោក វណ្ណារិទ្ធ និងភរិយា ចង់លក់ផ្ទះដើម្បីព្យាបានជំងឺ ប៉ុន្តែគ្មាននរណាទិញសោះ។ ចំណែករបស់របរក្នុងផ្ទះ ក៏លក់ខ្ទេចខ្ទីគ្មានសល់អ្វីសោះឡើយ ដើម្បីយកប្រាក់មកព្យាបាលជំងឺឱ្យប្តីបណ្តូលចិត្ត។
លោក វណ្ណារិទ្ធ ជាអ្នកខ្មែរដ៏ឆ្នើមមួយរូបមានទីលំនៅស្ថិតនៅស្រុកស្អាង ខេត្តកណ្តាល។ លោកទើបតែរៀបការប្រមាណជា៥ឆ្នាំនេះតែប៉ុណ្ណោះ។ ដោយសារជំងឺធ្វើទុក្ខខ្លាំង ហើយណាមួយលោក វណ្ណារិទ្ធ មានឈា.មជ័រជាអ្នកសិល្បៈមួយរូប មានចិត្តស្រលាញ់ភ្លេងបុរាណខ្មែរនោះ លោកបានប្រាប់ប្រពន្ធថា រូបលោកចង់ស្តាប់ភ្លេងការ ជាលើកចុងក្រោយ។
ជាការពិតណាស់ មើលឃើញវីដេអូឃ្លីបដែលមានក្រុមដន្ត្រីករ និងអ្នកចម្រៀងច្រៀងបទភ្លេងការហើយ គឺពិតជាក្តុកក្តួលអួលដើម.ក ស្ទើរតែទប់ទឹកភ្នែកមិនបាន ពិតជាអាសូរណាស់ ព្រោះរូបលោកនៅមានកូនតូចៗពុំទាន់ដឹងក្តីផង ស្រាប់តែរូបលោកពើបប្រទះនូវជំងឺកាចសាហា.វដែលកំពុងតែមកគំរា.មគំហែងជីវិតលោកគ្រប់វិនាទី។
បើតាមប្រភពអ្នកនាង ទិត្យ សុធារី បានឱ្យដឹងថា ពេលលឺថាបងប្រុសចង់ភ្លេងការដូច្នេះ ក៏ប្រញាប់ឱ្យក្រុមការងាររៀបចំលេងភ្លេង និងច្រៀងដោយអ្នកនាង ទិត្យ សុធារី ផ្ទាល់ដើម្បីឱ្យលោក វណ្ណារិទ្ធ ស្តាប់ឱ្យស្ងប់ចិត្ត។ ស្តាប់ហើយ ពិតជាកម្សត់ និងគួរឲ្យស្រណោះជាទីបំផុត។ប្រភព កោះសិន្តភាព
